http://api.ning.com/files/WIE*Cm5UgRNbductbgbtr*ETd4KviFl98Xpkejmx1agCNr1mZ4-qIAGvhAI3rzdPUScC*MMxJU0yqSpYY03OQkQiuNV5jE*d/swarnimgujarat3300x225.jpg


કોણ કે’ છે કે નમાલી છે પ્રજા ગુજરાતની ?
શૌર્યની ઈતિહાસમાં વાંચો કથા ગુજરાતની.
ગર્વ લેવા જેવી છે કૈં કૈં કથા ગુજરાતની,
કઇ કહું ? કઇ ના કહું ? મોંઘી મતા ગુજરાતની.
આ, અમારું ભોળું ઉર ને એ જ ભોળા ઉર મહીં,
ભોળી ભોળી ભાવનાઓ છે અહા ! ગુજરાતની.
મશ્કરી મારી કરશો તો હું સાંખી લઈશ,
પણ નહિં સાંખી શકું નિર્ભત્સના ગુજરાતની.
છે ભલેને માળવાની મેંદી તેથી શું થયું ?
રંગ હા લાવી શકે એ તો કલા ગુજરાતની.
રહી ગયેલી પુણ્યવંતા પૂર્વજોની એક દી’,
એષણા પૂરી અમે કરશું કદા ગુજરાતની.
આ હૃદયના ટાંકણા પર કોતરી ને રાખીશું,
રક્તથી જેણે જલાવી જ્યોત આ ગુજરાતની.
આ, વિરંચીએ રચેલી સૃષ્ટિ સૌ ખૂંદી વળો,
ક્યાંય નહિં જડશે તમોને જોડ આ ગુજરાતની.
એ ખરા ગુજરાતીઓ બાકી બધા તો નામના,
પ્રાણથી પ્યારી કરી જેણે ધરા ગુજરાતની.
ઝાઝું તો હું શું કહું એ સુરભૂમિથી પણ અધિક,
વહાલી વહાલી છે મને આ ભોમકા ગુજરાતની.
એમની પાસેથી હું ‘દિલદાર’ માંગું શું બીજું ?
સ્થાપજો સેવા મને કરવા સદા ગુજરાતની.


- મનહર ‘દિલદાર’

Categories:

Leave a Reply